ЖАҢАЛЫҚТАР

ТРАКТОР ТІРКЕМЕЛЕРІН ШЫҒАРАДЫ

Мақтаарал ауданы, Бірлік ауылдық округі, Қоңырат елді мекеніндегі «АШМ сервис Орталығы» өндірістік кооперативінде мақта шикізатын тасымалдауға арналған және өздігінен жүк түсіретін 2ПТСХ-10-45 модельді трактор тіркемелерін шығаратын шағын өндіріс іске қосылды.

Ғылыми және ғылыми-техникалық қызметтің нәтижелерін коммерция­ландыру туралы Қазақстан Республи­касының Заңын іске асыру барысында өткен «Ғылым қоры» акционерлік қоғамы тарапынан қаржыландырған жоба тұсаукесерін М.Әуезов атындағы ОҚМУ Ғылыми жұмыстар және инновация ісі жөніндегі проректоры Марат Сатаев жүргізіп отырды.

Жиын барысында «Ғылым қоры» акционерлік қоғамының төрағасы Әнуарбек Сұлтанғазиев «Ұлт жоспары – 100 нақты қадам» жоспарының 64-ші қадамын орындау шеңберінде іске асырылып жатқан жұмыстар жайында айтып өтті. Сондай-ақ, облыстық ауыл шаруашылығы басқармасы басшысының орынбасары Тұрғанбек Оспанов, ауыл шаруашылығы ғылымдары академиясының корреспондент мүшесі, техника ғылымдарының кандидиты, профессор Әбдукәрім Усманов, Мақтаарал ауданының әкімі Бақыт Асанов, экономика ғылымдарының докторы, еңбек ардагері Бегім Серіков, «Қазақ мақта шаруашылығы ғылыми-зерттеу институтының» директоры, академик Ибадулла Үмбетаев,  «Қазақ Мақта Ассосациясы» АҚ төрағасы Саин Бақтыбаев, «АШМ сервис Орталығы өндірістік кооперативінің» төрағасы Нұрлан Нұрбеков өңірдегі мақта шаруашылығын дамытудың жолдары туралы, техникалардың қолжетімділігі және жаңадан ұсынылған мақта шикізатын тасымалдауға арналған және өздігінен жүк түсіретін 2ПТСХ-10-45 модельді трактор тіркемелерінің тиімділігі жайында сөз етті.

Шараға қатысқан қонақтар заманауи үлгідегі жаңа тіркемелерді құрастыратын цехтарын аралап, жұмыс барысымен танысты. Өз идеясының халыққа тиімді екенін дәлелдеп, мемлекеттің қайтарымсыз 225 млн. теңге грантын жеңіп алған Нұрлан Нұрбеков аграрлы аймаққа қажетті тіркемелерді шаруаларға тиімді бағада шығаруды көздеп отырғанын айтты. Мұнда он адам жұмыспен қамтылатын болады. Сондай-ақ, қуаттылығы 10 тоннаға дейін мақта шикізатын тиеп, өздігінен төгуге арналған тіркемелерді шығаратын өндіріс орнында ауыл шаруашылығына қажетті қосалқы бөлшектерді жөндеу, қайта жасақтау жұмыстары да қолға алынғалы отыр.

Міне, бұл жерде шығарылатын ауыл шаруашылығы техникаларын және қосалқы бөлшектерді біздің Жетісай ауданы шаруалары да тапсырыс беріп, алуларына болады.

ЖЕТІСАЙ-АҚПАРАТ.

Пікір үстеу

Э-пошта мекенжайыңыз жарияланбайды. Міндетті өрістер * таңбаланған